Ilon Mask X sosial torunyň (öňki Twitter) maliýe kynçylyklaryny çekýändigini boýun aldy – kompaniýa çykdajylaryny zordan ýapýar. Bu barada Maskyň platformanyň işgärlerine iberen gulluk hatynda aýdylýar diýip, The Wall Street Journal we The Verge habar berýär.
Mask hatda ulanyjy bazasynyň durgunlaşýandygyny we mahabatlardan gelýän girdejiniň garaşylşy ýaly bolmandygyny belledi.
«Ulanyjy bazamyzyň ösüşi duruşýar, girdejiler kanagatlanarly däl, günümizi zordan aýlaýarys» diýip, milliarder maýa goýumlary çekmegiň wajyplygyny nygtady.
«Biz X-iň tutuş ýurtdaky çekişmeleri we wakalary nähili güýç bilen şekillendirýändigini gördük» diýip, sosial toruň eýesi düşündirdi. Hatda Mask, käbir kompaniýalaryň (habar çeşmeleri Meta kompaniýasy diýip çaklaýar) X-iň söz azatlygy baradaky çemeleşmelerini özleşdirýändigini we «Community Notes» ýaly funksiýalary hödürleýändigini hem agzap geçdi.
The Wall Street Journal-yň habaryna görä, uly banklar, şol sanda Bank of America, Barclays we Morgan Stanley, Maskyň 3 milliard dollar möçberindäki karzlaryny satmak üçin alyjy gözleýärler. Olar milliarder Maskyň prezident Donald Tramp bilen bolan ynamly aragatnaşyklarynyň bu meselä ýardam berjekdigine ynanýarlar.
Şol bir wagtyň özünde Twitter-iň satylan wagtlary paýnama satyn alan maýadarlar, başlangyç aktiwleriniň bahasynyň 78%-ini ýitirdiler. 2022-nji ýylda Mask Twitter-i 44 milliard dollara satyn aldy, şol möçberden 13 milliard dollar banklardan karz hökmünde alnan serişdelerdi. Ol her ýyl takmynan 1 milliard dollar tölemeli. Iki ýyldan soň, Fidelity analitikleri kompaniýanyň bahasyny 12,3 milliard dollar diýip kesgitlediler, bu sosial toruň satyn alnan bahasyndan 72% pesdir.
Similarweb-iň hasaplamalaryna görä, eýesi çalşandan soň sosial tor ABŞ-daky ulanyjylarynyň 20%-ini ýitirdi, häzirki wagtda ony diňe 73,5 million adam ulanýar.
X-iň «superplatforma» öwrülmegi baradaky garaýyşlar häzirlikçe ýerine ýetirilmedi, üstesine, edilen karzlar uly maliýe kynçylyklaryna öwrüldi.
