Telekeçi Ilon Mask Twitter kompaniýasyna ýolbaşçy boldy, öňki ýolbaşçylyk bolsa onuň ştab-kwartirasyny terk etdi. Bu barada penşenbe güni CNBC teleýaýlymynyň habarçysy Dewid Feýber çeşmelere salgylanyp, habar berdi. Muny TASS ýetirýär.
"Ilon Mask indi Twittere ýolbaşçylyk edýär. Maňa öňki baş direktor Parag Agrawalyň we maliýe müdiri Ned Sigalyň ştab-kwartirany terk edendikleri we Maskyň eýýamy başlanansoň gaýdyp gelmejekdikleri barada habar berildi" - diýlip, habarçynyň Twitterdäki habarynda aýdylýar.
"Financial Times" gazetiniň çeşmelere salgylanyp habar bermegine görä, Mask kompaniýany satyn almak baradaky şertnamany eýýäm ýapdy.
Soňra Maskyň özi hem kompaniýany satyn alandygy baradaky habara "guş erkinlikde" jümlesi bilen teswir berdi. Muny ol Twitter sosial ulgamyndaky sahypasynda ýerleşdirdi.
"Guş erkinlikde" - diýmek bilen, telekeçi şertnamanyň baglaşylmagyna reaksiýa bildirdi. Twitteriň logotipinde guş şekillendirilen. Sosial ulgamyň öz ady-da iňlis dilindäki "to tweet" (jürküldemek) işliginden gelip çykýar.
