Hytaýyň DeepSeek barlaghanasy R1 neýroulgamyny döretdi. Işläp düzüjileriň aýtmagyna görä, ol esasy testlerde OpenAI amerikan kompaniýasynyň o1 modelinden öňe geçýär. Gürrüň matematiki ýumuşlary çözmek, kod ýazmak başarnygyny we umumy öndürijiligi ölçeýän AIME, MATH-500 we SWE-bench Verified testleri barada gidýär diýip, TechCrunch neşiri habar berýär.
R1-iň aýratynlygy ýalňyşlaryň sanyny azaltmaga mümkinçilik berýän öz-özüni barlamak ukybydyr. Ýöne bu sebäpli neýroulgamyň jogaplary birnäçe sekuntdan birnäçe minuta çenli wagt alyp biler. Şeýle çemeleşme modeli ylym we matematika ýaly çylşyrymly ugurlarda has ygtybarly edýär.
R1 671 mlrd parametri öz içine alýar we iň uly EA modelleriniň biri hasaplanýar. Dürli zerurlyklar üçin 1,5 – 70 mlrd parametrli ýönekeýleşdirilen wersiýalar hem döredildi. Iň kiçi wersiýa noutbukda işläp biler, ýöne doly wersiýa üçin has kuwwatly enjam gerek bolar.
Şol bir wagtyň özünde, API arkaly R1-e girmek amerikan bäsdeşi bilen deňeşdirilende has arzandyr.
R1-iň öz nýuanslary hem bar: Hytaýda işlenip düzülendigi sebäpli, ol “esasy sosialistik gymmatlyklara” laýyk gelmek barlagyndan geçýär. Şol sebäpli model Hytaý üçin ýiti syýasy temalar baradaky soraglara jogap bermez.
