20-nji ýanwarda günüň ikinji ýarymynda türkmen halkynyň Milli Lideri Gurbanguly Berdimuhamedow Monakonyň Okeanografiýa muzeýine baryp gördi.
Bu ýerde türkmen halkynyň Milli Lideri Okeanografiýa muzeýiniň taryhy, Monako Knýazlygynyň ozalky Şazadasy Alber I-niň geçiren okeanografiýa boýunça taryhy we ylmy işleri bilen tanyşdyryldy.
Monakonyň Okeanografiýa muzeýi 1910-njy ýylda Şazada Alber I tarapyndan döredildi we dünýäniň öňdebaryjy okeanografiýa we biologiýa muzeýleriniň biri bolup durýar. Muzeý Ortaýer deňziniň kenaryndaky kert gaýada, 85 metr belentlikde ýerleşýär. Muzeýiň içinde dürli ýöriteleşdirilen bölümler bar. Okeanlaryň ösümlik we haýwanat dünýäsini öwrenmek hem-de goramak bu muzeýiň esasy maksadydyr.
Şazada Alber I öz döwrüniň görnükli alymy bolupdyr. Onuň ylmy-barlag işleri köp ulgamlary, şol sanda okeanografiýany, geografiýany we tebigy ylymlary öz içine alýar.
Ol 1889-njy ýylda Monakoda “Okeanografiýa stansiýasyny” esaslandyrýar. Soňra bu stansiýa deňiz biologiýasyny we okeanografiýany ylmy taýdan öwrenmek üçin merkez bolýar. Şazada Alber I deňiz çuňluklaryny öwrenmäge gönükdirilen ekspedisiýalary işjeň goldapdyr we olaryň birnäçesine özi hem gatnaşypdyr.
Soňra türkmen halkynyň Milli Liderine Muzeýiň akwarium bölüminde dünýäniň dürli ýerlerinden getirilen balyklaryň, suwda ýaşaýan beýleki jandarlaryň 6 müňden gowrak görnüşi we deňiz ösümlikleri görkezildi hem-de olar barada gürrüň berildi.
