Google emeli aň (AI) tehnologiýalaryny ösdürmekde öňdebaryjydygyny we Gemini atly modeliniň bäsdeşlerinden has gowudygyny aýdýar. Tehnoägirt Gemini-niň ulanyjy sanyny mälim etmeýär, şeýle-de ChatGPT-ni bolsa her hepde 300 million adam ulanýar diýip, The Wall Street Journal neşiri habar berýär.
Google emeli aň ugry boýunça öňdebaryjy bolsa-da, 2022-nji ýylda ChatGPT-niň işe başlamagy bilen ep-esli yzda galdy. Şondan bäri kompaniýa täze tehnologiýalary ösdürip, öňdeligi almak isleýär. Gemini tehnologiýasy käbir reýtinglere görä OpenAI-y geçdi. Şeýle-de bolsa, göçürip alynma sany boýunça Gemini henizem yza galýar. App Store-yň hasabatlaryna laýyklykda, Gemini-niň ýüklenip alma sany 106 million, ChatGPT-niňki bolsa 465 million.
Gemini häzirki wagtda Google-a uly girdeji getirmeýär. Premium abunalygy aýda 20 dollar bolup, ýany bilen 2 TB bulut ýat hyzmatyny hödürleýär. Käbir ulanyjylar emeli aň üçin däl-de, bu artykmaçlyklar üçin abuna bolýarlar. Olar bulut ýat hyzmatyny halasa-da, ChatGPT-ni ulanmagy makul görýärler.
Analitik kompaniýa Earnest Analytics-iň maglumatlaryna görä, Gemini ulanyjylarynyň 60%-i alty aýdan soň hem abunalygyny dowam etdirýär. Bu görkeziji köp bäsdeşleriniňkiden gowy bolsa-da, OpenAI-yň netijelerinden pesdir.
Gemini tehnologiýasy eýýäm Google-yň dürli önümlerinde ulanylýar, mysal üçin, gözleg netijelerinde, Gmail-iň we Google Drive-yň işewür görnüşlerinde. Google ony Pixel smartfonlarynda we beýleki enjamlarynda hem deslapky kömekçi hökmünde hödürleýär.
