TSMC taýwan çip öndürijisi dördünji çärýekde rekord derejede girdeji gazandy. Bu üstünlik emeli aň (AI) ulgamlary üçin niýetlenen çiplere bolan islegiň artmagy bilen baglanyşyklydyr. Kompaniýanyň arassa girdejisi 57% ýokarlanyp, 11,4 milliard dollara, umumy girdejisi bolsa 38,8% artyp 26,36 milliard dollara ýetdi diýip, Bloomberg habar berýär.
TSMC 2024-nji ýylda umumy 90,08 milliard dollar girdeji gazandy, bu öňki ýyl bilen deňeşdirilende 30% ýokarydyr. Şeýlelikde, kompaniýanyň girdejililigi hem ýokarlandy: girdeji normasy 56,1%-e ýetdi.
Analitiklere görä, TSMC 2025-nji ýylda diňe bir AI däl, eýsem smartfonlardan, kompýuterlerden hem-de Intel-den alnan sargytlaryň köpelmegi netijesinde ösüşini dowam etdirer. Kompaniýa täze tehnologiýalara maýa goýmak üçin 2025-nji ýylda maýa goýum çykdajylaryny 41% artdyrmagy meýilleşdirýär.
Kompaniýanyň girdejisiniň esasy bölegi ösen tehnologiýalardan (3nm, 5nm we 7nm) gelip gowuşýar. Esasan-da, 3nm tehnologiýasy soňky çärýekde girdejiniň 26%-ini emele getirdi. AI çipleri bilen bagly hasaplama ulgamlary bolsa girdejiniň 53%-ini üpjün etdi. Bu görkeziji smartfon pudagyndan (35%) ýokary boldy. Şeýle-de, girdejiniň köp bölegi (75%) Demirgazyk Amerikadan gelip gowuşdy.
TSMC häzirki çärýekde hem girdejiniň ýokarlanjakdygyna ynanýar. Kompaniýa ýyllyk girdejiniň 24-26% ýokarlanjakdygyny we bu ösüşiň AI tehnologiýalara bolan talap bilen dowam etjekdigini çaklaýar.
