SpaceX kompaniýasy ýedinji synag uçuşynyň dowamynda Starship kosmos gämisiniň ýokarky bölegini ýitirdi. Bu barada Bloomberg habar berýär.
Uçuryş 16-njy ýanwarda ýerli wagt bilen 17:38-de (Aşgabat wagty bilen 17-nji ýanwarda sagat 03:37) Tehas ştatynyň günorta-gündogarynda ýerleşýän Boka-Çika şäherindäki Starbase uçuş meýdançasyndan amala aşyryldy.
Super Heavy tizleşdirijisi (raketanyň aşaky basgançagy) Ýere üstünlikli gaýdyp geldi we kosmodromdaky ýörite enjam – Mechazilla diňi tarapyndan tutuldy. Ýöne ýokarky basgançak bilen aragatnaşyk uçuşdan 8,5 minutdan soň kesildi. Bu kosmosa ýük eltmegi göz öňünde tutan ilkinji uçuşdy.
SpaceX kompaniýasynyň eýesi Ilon Mask raketanyň ýok bolmagynyň sebäbini kislorodyň ýa-da ýangyjyň syzmagy bilen baglanyşdyrdy.
“Deslapky maglumatlara görä, gämi hereketlendirijisiniň braundmaueriniň üstündäki boşlukda kislorodyň/ýangyjyň syzmagy bolup geçdi” – diýip, ol X sosial ulgamyndaky sahypasynda ýazdy.
Onuň aýtmagyna görä, syzma diýseň güýçli bolup, ol wentilýasiýa deşikleriniň mümkinçiliklerinden artyk basyşy döretdi.
Indi SpaceX raketany syzma tarapdan düýpli barlamagy we ýangyn söndüriş ulgamyny goşmagy meýilleşdirýär.
