Germaniýanyň günbataryndaky Reýnland-Pfalz federal ýerindäki Koblens şäherinde 8-nji mart güni agşam asmandan düşen meteorit bölegi ýaşaýyş jaýynyň üstüne düşdi.
Koblens polisiýasynyň berýän maglumatyna görä, Gýuls raýonynda sagat 19:00 töweregi kömürleşen asman jisimi jaýyň üçeklerini deşip geçdi. Meteorit jaýyň ýatylýan otagyna düşdi. Hernä, edil şol wagt otagda hiç kim ýok ekeni.
Polisiýa wekilleri Hunsrýuk hem-de Aýfel daglyk sebitlerinden hem şuňa meňzeş şikaýatlaryň gelip gowuşandygyny aýdýarlar. Olaryň pikiriçe, meteoritiň bölekleri şol ýerdäki jaýlaryň üçeklerine-de düşüp, zeper ýetiren bolmaly.
Germaniýanyň Aşaky Saksoniýa, Gessen, Saar we Demirgazyk Reýn-Westfaliýa ýaly köp sanly günbatar sebitleriniň ýaşaýjylary asmandaky bu güýçli ýagtylyk hadysasyny synladylar we onuň wideolaryny hem-de suratlaryny jemgyýetçilik torlarynda paýlaşdylar. Kaýzerslautern şäheriniň polisiýa gullugynyň aýdyşy ýaly, käbir ýaşaýjylar ilkibaşda asman jisimine raketadyr öýdüp, ýalňyş kabul edipdirler.
Hukuk goraýjy edaralary waka sebäpli hiç hili howply ýagdaýyň bolmandygyny tassyklaýarlar.
