Hytaý iň uly litiý ätiýaçlyklary bolan ýurtlaryň arasynda altynjy orundan ikinji orna çykdy. Onuň dünýä bazaryndaky paýy 6%-den 16,5%-e çenli artdy diýip, Hytaýyň geologiýa gullugynyň maglumatlaryna salgylanyp, Sinhua agentligi habar berýär.
Reýtingde Hytaý Awstraliýadan, Argentinadan we Boliwiýadan öňe geçdi. Bu görkeziji babatda birinji orny henizem Çili eýeleýär.
Ätiýaçlyklaryň köpelmegine, esasan, ýurduň günbatar bölegindäki täze açyşlar ýardam etdi. Bu ýerde uzynlygy 2,8 müň km bolan litiý guşaklygy tapyldy. Şeýle-de, Tibet düzlüginiň mineral köllerindäki ätiýaçlyklar ep-esli artdy we netijede Hytaý şeýle ýataklarda litiý ätiýaçlygy boýunça üçünji orna çykdy.
Mundan başga-da, hytaýly alymlara lepidoliti – düzüminde litiý ýokary bolan mineraly gaýtadan işlemekde tehnologiki kynçylyklary ýeňip geçmek başartdy. Öň bu proses kynlygy we gymmatlygy bilen tapawutlanýardy.
Litiý elektromobil, akkumulýator önümçiligi, ykjam aragatnaşyk we beýleki tehnologiýalar üçin örän möhümdir. Litiý ýataklaryny gözlemek Hytaýa importa garaşlylygyny azaldyp, dünýä bazarynda deňagramlylygy ýokarlandyrmaga kömek eder diýip, hünärmenler belleýär.
