Koloradoly alymlar süýji keseli bejermek we işdäni peseltmek üçin giňden peýdalanylýan meşhur Ozempic sanjymynyň täsirinden has hem güýçli bolan semizlik sanjymyny döretdiler. Synaglaryň netijeleri «Brain, Behavior, and Immunity» ylmy žurnalynda çap edildi.
Täze döredilen sanjym işdäni peseltmeýär, ol bedende artykmaç ýagyň toplanmagynyň öňüni alýar. Şonuň üçin islendik zady iýseňiz hem, agramyňyz üýtgewsiz galar.
Sanjym ilkinji gezek laboratoriýada syçanlarda peýdalanyldy. Syçanlar üç topara bölündi we 10 hepdeden soň ilkinji netijeler alyndy. Zyýanly iýmitler bilen iýmitlendirilip, sanjym edilmedik syçanlar artykmaç agram aldylar. Emma sanjym edilen syçanlaryň agramy bolsa, sagdyn iýmitlenen syçanlaryň agramy bilen deňeşdirilende tas deň boldy.
Alymlar bu sanjymy döretmekde mycobacterium vaccae atly bakteriýalary ulanandyklaryny habar berdiler. Bu bakteriýalar sygryň süýdünde we toprakda duş gelýär.
Muňa garamazdan, alymlar entek bu sanjymyň adam bedenine nähili täsir etjekdiginiň anyk däldigini duýdurdylar. Şonuň üçin olar sanjymyň netijeliligini we mümkin töwekgelçiliklerini öwrenmek üçin meýletin synagçylary saýlamagy meýilleşdirýärler.
Sanjymyň bahasy heniz kesgitlenmedi. Onuň resmi taýdan tassyklanmagy bolsa kliniki synaglaryň üstünligine bagly bolar. Şeýle-de bolsa, alymlar bu açyşyň köp adamyň artykmaç agramdan dynmagyna kömek etjekdigine umyt baglaýarlar.
