BMW 4-Series (kupesi we kabrioleti) ikinji el ulag bazarynda benzinli hereketlendirijili awtoulaglaryň arasynda iň meseleli modelleriň sanawynda birinji orny eýeledi. Bu gözlegi Britaniýanyň Whatcar neşiri we Ýewropanyň MotorEasy ätiýaçlandyryş kompaniýasy bilelikde geçirdi.
Bilermenler soňky iki ýylyň dowamynda awtoulaglary baradaky tejribelerini paýlaşan 30 müňden gowrak awtoulag eýeleri bilen sorag-jogap alyşdylar.
Netijede, 2013-2020-nji ýyllar aralygynda öndürilen BMW 4-nji seriýa modellerinde kemçilikleriň has ýygy ýüze çykandygy kesgitlenildi. Bu modelleri ulanan her dört adamdan biri akkumulýator, hereketlendiriji, elektrik ulgamy, tormoz, ýangyç ulgamy hem-de howa sazlaýjy (kondisioner) bilen baglanyşykly näsazlyklar bilen ýüzbe-ýüz bolupdyr.
Näsazlyklaryň üçden bir bölegi kepillik şertlerinde düzedilen hem bolsa, köp sürüjiler üçin abatlaýyş çykdajylary 1000 funt sterlinge (takmynan 1250 ABŞ dollaryna) ýetipdir. Mundan başga-da, sürüjiler abatlaýyş işleriniň uzak dowam edendiginden nägile bolupdyrlar — sebäbi, awtoulaglaryň ýarysyndan gowragy hyzmat merkezlerinde bir hepdeden gowrak saklanypdyr.
BMW modelinden başga-da, iň ygtybarsyz benzinli hereketlendirijili awtoulaglaryň ilkinji üçlügine MG ZS krossoweri (2017-nji ýyldan bäri öndürilýär) we ykjam Fiat 500 (2008-nji ýyldan bäri öndürilýär) girýär. Bu modelleriň hem eýelerine dürli oňaýsyzlyklar döredýändigi barada habar berilýär.
