Türkmenistanyň raýatlary bakalawr, hünärmen, magistr, aspirantura, ordinatura, goşmaça hünär bilimi we assistentura-stažirowka maksatnamalary boýunça Russiýanyň ýokary okuw mekdeplerinde tölegsiz bilim alyp bilerler. Bu barada Russiýanyň Türkmenistandaky ilçihanasynyň saýtynda habar berilýär.
Seçip alşa gatnaşmak üçin education-in-russia.com saýtynda bellige alynmaly we 2025-nji ýylyň 15-nji ýanwaryna çenli (15-i girýär) arza bermeli.
Sowalnama doldurylanda soralýan resminamalaryň ählisini berkitmek we "Arzany ugratmak" düwmesine basmak möhümdir. Munuň özi "Garalama" statusynyň "Barlag" derejesine üýtgemegi üçin gerek. Eger şeýle edilmese arza hakyky däl diýlip hasaplanar we dalaşgär 2025/2026 okuw ýyly üçin maksatnama gatnaşyp bilmez.
Birinji tapgyrda Türkmenistanyň raýatlaryna şu resminamalary taýýarlamak zerur:
- sowalnamanyň skan edilen görnüşi we şahsy maglumatlary ulanmaga razylyk (awtomatik ýagdaýda formirlenýär);
- Türkmenistanyň daşary ýurt üçin pasportynyň skan edilen görnüşi;
- Bilim hakynda resminamanyň skan edilen görnüşi (bahalaryň tabeli/orta mekdebi tamamlandygy hakynda şahadatnama; dekanlykdan bahalaryň tassyknamasy/ ýokary bilim hakynda diplom).
Iki ýurduň raýaty bolup durýanlar üçin rus daşary ýurt pasportynyň we Türkmenistanyň raýatynyň pasportynyň skan edilen görnüşini goşmak zerur.
