Ýapon alymlary Saturnyň halkalarynyň ýaşy barada umumy kabul edilen nazaryýete garşy çykdylar we onuň planetanyň özi ýaly gadymy bolup biljekdigini aýtdylar. Olar öz barlaglaryny Nature Geoscience žurnalynda hödürlediler diýip, Phys.org habar berýär.
Öňki teoriýa görä, planetanyň halkalary takmynan 100-400 million ýyl ozal peýda bolupdyr. Bu tassyklama “Kassini” kosmos gämisi tarapyndan alnan maglumatlara esaslanýardy, ýöne täze barlaglar bu pikiri üýtgedip biler.
Alymlar halkalar bilen çaknyşýan mikrometeoritleriň yz galdyrman bugaryp gidýändigini, kosmos galyndylary bilen çaknyşmagyna garamazdan, halkalary arassa saklaýandygyny görkezýän simulýasiýa geçirdiler.
Öň halkalaryň arassalygy olaryň ýaşdygyny görkezýär diýip hasaplanýardy. Emma ýaponiýaly astronomlar halkalaryň ýaşynyň 2,25-4,5 milliard ýyl aralygynda bolup biljekdigini çaklaýarlar, bu bolsa planetanyň ýaşy bilen deňeçerdir.
Şeýle hem, barlagçylar Gün ulgamynyň emele gelşiniň irki döwrüniň tertipsizlikde geçendigi baradaky delillerini berkidýärler. Onda Saturnyň halkalarynyň emele gelmegi üçin bölekler bolup hyzmat edip biljek köp sanly gurluşyk materialy bolupdyr.
