19-njy dekabrda Türkmenistanyň DIM-nde daşary işler ministriniň orunbasary Ahmet Gurbanow Ermenistanyň ilçisi Arsen Awagýan bilen duşuşdy. Bu barada türkmen daşary syýasat edarasynyň saýtynda habar berilýär.
Duşuşygyň barşynda depginli ösdürilýän türkmen-ermeni gatnaşyklarynyň ileri tutulýan ugurlary boýunça gyzyklanma bildirilip pikir alşyldy.
Bilelikdäki hökümetara toparynyň işiniň söwda-ykdysady gatnaşyklaryny işjeňleşdirmekde ähmiýetli orun eýeleýändigi nygtaldy.
Söhbetdeşligiň dowamynda taraplar Ermenistanyň Prezidenti Waagn Haçaturýanyň şu ýylyň oktýabrynda Magtymguly Pyragynyň doglan gününiň 300 ýyllygy mynasybetli geçirilen «Döwürleriň we siwilizasiýalaryň özara arabaglanyşygy – parahatçylygyň we ösüşiň binýady» atly halkara forumyna gatnaşmagynyň ähmiýetini bellediler.
Şeýle-de diplomatlar halklaryň ýakynlaşmagyna ýardam berýän möhüm şert hökmünde medeni-ynsanperwer ugurundaky gatnaşyklaryň ähmiýetine üns çekdiler.
