Amerikanyň Kino sungaty akademiýasy 10 kategoriýa boýunça “Oskar” baýragyna dalaşgärleriň gysga sanawyny yglan etdi. Olaryň arasynda iň oňat halkara film, saundtrek, dokumental we gysga metražly işler, şeýle hem grim, ses we wizual effektler üçin baýrak almak ugrunda dalaş edýänler bar.
“Iň gowy halkara film” kategoriýasynda 15 film görkezilýär. Beýlekiler bilen bir hatarda, iri halkara festiwallarynda eýýäm baýrak alan filmler heýkel almak ugrunda bäsleşer. Olar fransuz režissýory Žak Odiaryň “Emiliýa Peres”, eýranly Mohammad Resulofyň “Mukaddes injiriň tohumy”, senegally Mati Diopyň “Dagomeý”, braziliýaly Walter Sallesiň “Men henizem bärde” we islandiýaly Baltasar Kormakuryň “Galtaşma” filmleridir. Sanawda Angliýanyň, Daniýanyň, Italiýanyň, Kanadanyň, Latwiýanyň, Norwegiýanyň, Palestinanyň we Taýlandyň filmleri hem bar.
“Iň oňat asyl sauntrek” kategoriýasynda “Bäsdeşler”, “Konklaw”, “Ýabany robot”, “Bitljus Bitljus” we “Tapmaça 2” filmleri üçin aýdym ýazan kompozitorlaryň arasynda bäsleşik bolar.
“Gara gutynyň gündelikleri”, “Dagomeý”, “Frida”, “Golliwudgeýt” we “Farfor söweşi” “Iň oňat dokumental film” adyny almak ugrunda bäsleşer.
“Oskar” baýragynyň 97-nji gowşurylyş dabarasy 2025-nji ýylyň 2-nji martynda geçiriler. Çäräni amerikaly meşhur wäşi Konan O'Braýen alyp barar.
