Şu gün, 16-njy dekabrda Aşgabat şäherinde Eýran Yslam Respublikasynyň «Iran Agrofood» atly 16-njy ýöriteleşdirilen sergisi we Türkmen-eýran işewürlik maslahaty öz işine başlady. Prezident Serdar Berdimuhamedow foruma gatnaşyjylara gutlag iberdi.
Sergide oba hojalygy, azyk we gaýtadan işleýän senagat, oba hojalyk, azyk önümlerini gaplamagyň, saklamagyň we daşamagyň döwrebap tehnologiýalary, olaryň eksporty hem importy bilen bagly ugurlarda iş alyp barýan kompaniýalar innowasion ösüş ýolunda ýeten sepgitlerini görkezerler. Türkmen-eýran işewürlik maslahatynyň çäginde bolsa öňdebaryjy tejribelerini, işläp taýýarlamalaryny alşarlar, hyzmatdaşlygyň geljekki mümkinçiliklerini, täze taslamalary ara alyp maslahatlaşarlar.
Serdar Berdimuhamedow nebitgaz, energetika, senagat, oba we suw hojalygy, gurluşyk, ulag-aragatnaşyk pudaklarynda netijeli hem-de özara bähbitli gatnaşyklaryň yzygiderli ösdürilýändigini belledi. Asylly däbe öwrülen ýöriteleşdirilen sergileriň, işewürlik maslahatlarynyň yzygiderli geçirilmegi hyzmatdaşlygyň ugurlaryny giňeltmekde, döwlet we hususy kärhanalaryň özara gatnaşyklaryny täze taslamalar bilen baýlaşdyrmakda, ýurtlarymyzyň arasyndaky haryt dolanyşygyny artdyrmakda uly ähmiýete eýedir.
"Ýokary guramaçylyk derejesinde geçirilýän bu çäreler iki ýurduň işewür toparlarynyň arasynda ýola goýlan uzak möhletleýin hyzmatdaşlygyň mundan beýläk-de ösdürilmegine oňyn täsir eder" diýip, döwlet Baştutanynyň gutlagynda aýdylýar.
