Amerikaly telekeçi Ilon Mask SpaceX kompaniýasynyň ştab-kwartirasynyň göçürilýändigini habar berdi. Indi ol Tehasyň Starbeýs şäherinde, kompaniýanyň ýüzlerçe işgäriniň işleýän kosmos bazasynda ýerleşer diýip, RBK habar berýär.
Maskyň aýtmagyna görä, SpaceX-iň ýolbaşçylygy kosmos uçuşlary üçin niýetlenen bu meýdança resmi şäher statusyny bermek başlangyjy bilen çykyş etdi.
Soňrak ulanyjylaryň birine jogap bermek bilen, Mask öz ejesi Meý Masky belläp, şeýle ýazdy: “Eje, seret, men şäher döretdim”.
Kosmodromyň bazasynda şäher döretmek pikiri Maskda 2021-nji ýylda peýda boldy. Şol wagt ol uly bolmadyk goňşy şäher Boka-Çikanyň adyny Starbeýs diýip üýtgetmegi teklip etdi – bu ýerde kompaniýanyň kosmos enjamlarynyň prototipleri işlenip taýýarlanýar.
Öň, Mask salgyt we kadalaşdyryjy ýeňillikleri göz öňünde tutup, Tesla-nyň ştab-kwartirasyny Kaliforniýadan Tehasa geçiripdi. Ol ofisleri göçürmek meýilnamalaryny Kaliforniýa ştatynyň syýasatyndaky birnäçe üýtgeşmeler, şeýle-de howpsuzluk meseleleri bilen baglanyşdyrdy.
Tehasa geçilmegi ýokary salgytlardan hem gaçmaga mümkinçilik berer. ABŞ-da iň ýokary girdeji salgydynyň hereket edýän ýeri bolan Kaliforniýadan tapawutlylykda, Tehasda ol nola deň. Baş ofisiň geçirilmegi “Mask üçin milliardlarça dollary tygşytlap biler” diýip, CNBC ýazýar.
