S.A.Nyýazow adyndaky Türkmen oba hojalyk uniwersiteti ýurdumyzyň we daşary ýurtlaryň ýokary okuw mekdepleriniň talyplarynyň arasynda ekologiýa dersi boýunça geçirilen III Açyk halkara internet olimpiadasynyň netijelerini mälim etdi. Oňa daşary ýurtlaryň 70-e golaý ýokary okuw mekdebinden hem-de ýurdumyzdan jemi 500 talyp gatnaşdy diýip, "Türkmenistan" gazetinde habar berilýär.
Ekologiýa boýunça III Açyk halkara internet olimpiadasynda populýasiýalaryň ekologiýasy we biosferasy; adam ekologiýasy we häzirki zaman ekologiýa meseleleri; senagat ekologiýasy; ekologik monitoring; ekologiýa kanunçylygy we halkara guramalar ýaly mowzuklardan ýumuşlar hödürlenildi. Olary ýerine ýetirmek üçin 90 minut wagt berildi. Olimpiada gatnaşyjylaryň işleri programma üpjünçiligi arkaly bahalandyrylyp, toplanan ballaryň jemi boýunça netijeler jemlendi.
Halkara bäsleşikde oňa gatnaşyjylaryň 168-si ýeňiji diýlip yglan edildi. Olardan 31-si birinji, 56-sy ikinji hem-de 81-si üçünji orunlara mynasyp boldular. Ýeňijilere diplomlar we medallar, ýadygärlik sowgatlar gowşuryldy.
