Ilon Mask dünýäde baýlygy 400 milliard dollardan geçen ilkinji adam boldy. “Bloomberg-iň" (Bloomberg Billionaires Index) maglumatyna görä, 11-nji dekabra çenli "Tesla-nyň" we "SpaceX-iň" baştutanynyň baýlygynyň görkezijisi 439,2 milliard dollara ýetdi.
Bu “Tesla-nyň" paýnamalarynyň bahasynyň ýokarlanmagy sebäpli mümkin boldy. Onuň her bir aksiýasy 415 dollardan ýokary derejä bardy. ABŞ-da geçirilen saýlawlardan soň, olaryň gymmaty 60% ýokarlandy.
Maskyň maýasynyň ösüşi dünýädäki iň gymmatly startap bolan 350 milliard dollarlyk “SpaceX-iň" bahasy bilen baglanyşyklydyr. Munuň netijesinde telekeçiniň baýlygy 50 milliard dollar artdy.
Ilon Mask Jeff Bezos we Mark Sukerberg ýaly beýleki milliarderlerden ep-esli öňde barýar. "Informa Connect Academy-nyň" analitikleriniň pikiriçe, Maskyň baýlygy bir ýylda ortaça 110% ösdi. Ösüş bu depgin bilen dowam etse, Ilon Mask 2027-nji ýyla çenli taryhda ilkinji dollarly trillioner bolup biler.
Dünýädäki ikinji trillioner 2028-nji ýyla çenli "Adani" kompaniýanyň esaslandyryjysy, hindi milliarderi Gautam Adani bolar diýlip çaklanylýar. “Nvidia-nyň" baş direktorynyň wezipesini ýerine ýetiriji Jensen Huang bilen indoneziýaly magnat Prajogo Pangestunyň baýlygy hem 2028-nji ýylda 1 trillion dollardan geçip biler diýip, rbc.ru ýazýar.
