12-nji dekabrda Aşgabatda Mejlisler merkezinde Halkara Bitaraplyk güni mynasybetli baýramçylyk konserti geçirildi. Oňa Prezident Serdar Berdimuhamedow gatnaşdy diýip, TDH habar berýär.
Dabara Hökümet agzalary, ministrlikleriň we pudaklaýyn dolandyryş edaralarynyň, jemgyýetçilik guramalarynyň ýolbaşçylarydyr wekilleri, ýurdumyzdaky diplomatik wekilhanalaryň hem-de halkara guramalaryň ýolbaşçylary, Türkmenistanyň daşary ýurtlardaky ilçileri, döredijilik işgärleri, hormatly ýaşulular, talyplar, köpçülikleýin habar beriş serişdeleriniň wekilleri gatnaşdylar. Şeýle hem tomaşaçylaryň hatarynda köp sanly daşary ýurtly myhmanlar bar.
Konsert maksatnamasy belli artistleriň, ýaş estrada aýdymçylarynyň ýurtlara we yklymlara özboluşly syýahata alyp gidýän çykyşlaryndan ybarat boldy. Söýgi, dostluk, daşymyzy gurşap alýan dünýä barada azerbaýjan, iňlis, ermeni, hindi, gazak, gyrgyz, rus, täjik, türk we özbek dillerinde ýerine ýetirilen aýdymlar tomaşaçylarda aýratyn gyzyklanma döretdi. Tans toparlary dürli halklaryň milli lybaslarynda azerbaýjan, ermeni, owgan, hindi, gazak, gyrgyz, rus, türk we özbek tanslaryny ýerine ýetirip, sungatyň jebisleşdiriji güýjüni görkezýän köpöwüşginli kompozisiýany jemledi. Aýdym-sazly, tansly kompozisiýa dünýäniň şäherleriniň owadan ýerlerini we gözelliklerini, dürli halklaryň özboluşly däp-dessurlaryny, parahatçylykda, dostlukda ýaşamak ýaly bitewi arzuw-islegleri şöhlelendirýän wideoşekiller bilen utgaşdy.
Konsert maksatnamasy milli sungatymyzyň baý mümkinçiliklerini we onuň däpleriniň dowam etdirilýändigini görkezýän dürli žanrly we ilkinji gezek görkezilýän çykyşlar bilen tapawutlandy.
Baýramçylyk konsertiniň ahyrynda ýaş nesliň wekilleri Prezident Serdar Berdimuhamedowa hoşallygyň nyşany hökmünde gül desselerini berdiler. Döwlet Baştutany hem körpelere öz ajaýyp sowgatlaryny gowşurdy.
