10-njy dekabrda Osloda, Alfred Nobeliň hatyralanýan güni Parahatçylyk boýunça Nobel baýragynyň gowşurylyş dabarasy geçirildi. Şu ýyl baýrak ýadro ýaragyndan azat dünýäni gurmak ugrundaky tagallalary üçin Ýaponiýanyň “Nihon Hidankýo” guramasyna berildi. Çäre Nobel gaznasynyň saýtynda ýaýlyma berildi.
Dabara Norwegiýanyň şa magalasynyň we hökümet agzalarynyň gatnaşmagynda şäher edarasynda geçirildi. Baýragy Norwegiýanyň Nobel komitetiniň başlygy Ýorgen Watne Fridnes gowşurdy. Alfred Nobeliň portreti bolan altyn medal guramanyň üç wekiline berildi.
“Baýragyň laureatlarynyň işi ýadro ýaragynyň howpuny azaltmaga ýardam etdi. Şeýle parahatçylygy goraýyş işleri üçin jemi 13 parahatçylyk baýragy doly ýa-da bölekleýin berildi. Şonça gezek hem Norwegiýanyň Nobel komiteti ýadro ýaragy howpuny öňünden duýdurmak üçin bu pursatdan peýdalandy” – diýip, Fridnes aýtdy.
Çärä Hirosimadaky we Nagasakidäki atom partlamalaryndan aman galan 17 adam gatnaşdy. “Nihon Hidankýonyň” egindeş başlygy 92 ýaşly Terumi Tanaka ýadro ýaragyny bütin dünýäde ýok etmäge çagyrdy.
1956-njy ýylda döredilen gurama onlarça ýyl bäri BMG-ä rezolýusiýalary we ýüzlenmeleri iberýär hem-de parahatçylyk konferensiýalaryna gatnaşyp, ýadro betbagtçylygynyň gaýtalanmagyna ýol bermeli däldigini belleýär.
