13-nji dekabrda ÝUNESKO-nyň Pariždäki ştab-kwartirasynda “Diwany lugat et-türk” (“Türki dilleriň sözlügi”) eseriniň 950 ýyllygyna bagyşlanan halkara konferensiýa geçiriler. Meşhur sözlük alym, filosof Mahmyt Kaşgarly tarapyndan düzüldi.
Report agentliginiň maglumatlaryna görä, konferensiýa türki ýurtlaryň ÝUNESKO-nyň işleri boýunça milli komissiýalarynyň baş sekretarlary we olaryň hemişelik wekilleri gatnaşar. Çäräniň maksady ýygyndynyň dünýä medeniýetine goşan goşandyny, şeýle-de türki halklaryň dil we medeni mirasy meselelerini ara alyp maslahatlaşmakdan ybarat.
Gatnaşyjylaryň hatarynda Türkmenistandan, Azerbaýjandan, Gazagystandan, Gyrgyzystandan, Türkiýeden, Özbegistandan, Wengriýadan we beýleki ýurtlardan alymlar, ylmy gözlegçiler we dürli halkara guramalarynyň wekilleri bolar.
Mahmyt Kaşgarlynyň mirasyna aýratyn üns berler. Şeýle-de, çäräniň çäklerinde onuň gymmatly ensiklopedik işi barada dokumental film hödürlener.
