8-nji dekabrda Türkmenistanda harby we hukuk goraýjy edaralaryň bilelikde geçiren işleriniň netijesinde ele salnan neşe serişdelerini, bikanun ýol bilen getirilen temmäki önümlerini ýakyp ýok etmek çäresi boldy.
Bu çäre Içeri işler ministrliginiň bikanun dolanyşykdan alnan neşe we beýleki serişdeleri ýakyp ýok etmek üçin niýetlenen toplumynda geçirildi diýip, “Türkmenistan” gazetinden habar berilýär.
Çärä Hökümet agzalary, Döwlet howpsuzlyk geňeşiniň agzalary, jemgyýetçilik guramalarynyň, saglygy goraýyş ulgamyna degişli düzümleriň, köpçülikleýin habar beriş serişdeleriniň ýolbaşçylarydyr işgärleri, il sylagly ýaşulular gatnaşdylar.
Şu gezekki çäräniň dowamynda ýurdumyzyň hukuk goraýjy edaralarynyň tagallalary bilen ele salnan neşe serişdeleri, temmäki we gadagan edilen derman önümleri bu ýere ýygnananlara görkezildi.
Çärä gatnaşyjylar ynsan saglygy üçin howply serişdeleri ýörite peçlere öz elleri bilen okladylar. Bu ugurda tassyklanan Düzgünnama laýyklykda, neşe serişdelerini ýakmak çäresi hukuk goraýjy edaralaryň işgärleriniň we ygtyýarly bilermenleriň gözegçiligi astynda geçirildi.
