Nýu-Ýorkdaky Kolumbiýa uniwersitetiniň inženerler topary radioýygylykly aragatnaşyk üçin çeýe we ýeňil antennalary döretmekde adaty örme usulyna ýüzlendiler. Alnan “ýorgany” aňsatlyk bilen eplemek we açmak bolýar diýip, RBK ýazýar.
Alymlaryň aýtmagyna görä, şeýle antennalar uly hemra tarelkalaryna alternatiwa bolup, uzak ýa-da kyn ýerlerde aragatnaşygy ep-esli aňsatlaşdyryp biler.
Taslama inženeriýa we amaly ylymlar fakultetiniň topary tarapyndan işlenip taýýarlandy, munuň üçin topar tarapyndan elektromagnit tolkunlaryny dolandyryp bilýän emeli usulda döredilen materiallar ulanyldy.
Inženerler ýüzýän žakkard örümi tehnikasyndan peýdalandylar, prosesiň dowamynda metal we dielektrik sim sapaklary dokma materialyna goşup örüldi. Öň, geçiriji örtükleri taýýar mata geçirmäge synanyşyk edildi, ýöne olar zeper ýetmelere getirdi.
Işlenip taýýarlanan antennalar adaty pled ýa-da ýorgan ýaly görünýär we birnäçe gezek ýuwmak hem ýazmak üçin çydamlydyr. Her biriniň meýdany 1 inedördül metr bolan iki prototip 1,5 sagatda taýýarlandy.
Alymlar şeýle gurluşlaryň adaty hemra antennalaryna arzan, ykjam we çeýe alternatiwa bolup biljekdigine ynanýarlar.
Geljekde örülen antennalar dürli pudaklarda, şol sanda ykjam aragatnaşygy kämilleşdirmekde we hatda Wi-Fi-y güýçlendirmek funksiýasy bilen switerleri döretmekde peýdalanylyp bilner.
