3-5-nji dekabr aralygynda Aşgabatda "Arçabil" myhmanhanasynda “Töwekgelçilikleri dolandyrmagy utgaşdyrmak arkaly weterinariýa gözegçiliginiň netijeliligini ýokarlandyrmak” atly sebitleýin okuw maslahaty geçirildi. Bu çäräni BOMKA-10 Maksatnamasy Türkmenistanyň Oba hojalygy ministrliginiň Weterinariýa gullugy bilen hyzmatdaşlykda gurady.
Sebitleýin seminarda Türkmenistanyň Oba hojalygy ministrliginiň Weterinariýa gullugynyň Halkara we ylmy gatnaşyklar bölüminiň müdiri Arslan Soltanmyradow çykyşynda weterinariýa ulgamynda häzirki zaman töwekgelçilik dolandyryş usullaryny ornaşdyrmagyň ähmiýetini belläp, töwekgelçilikleri netijeli dolandyrmagyň azyk howpsuzlygyny we haýwan saglygyny üpjün etmekde, şeýle hem halkara söwdany ýeňilleşdirmekde möhüm ugur bolup durýandygyny nygtady.
Seminara Merkezi Aziýa ýurtlaryndan töwekgelçilik dolandyryşyň milli kanunçylyga ornaşdyrylmagyna jogapkär ýolbaşçy hünärmenler hem-de eksport-import amallarynda weterinariýa gözegçiligi we haýwanlardan alynýan önümleriň sertifikatlaşdyrylyşy bilen meşgullanýan halkara bilermenler gatnaşdylar.
Çäräniň dowamynda halkara tejribe alyşmaga aýratyn üns berildi. Ýewropa Bileleşiginiň bilermenleri hökmünde aşakdakylar çykyş etdiler:
- Maris Dominiş, BOMKA-10 Maksatnamasynyň sebitleýin ýolbaşçysy;
- Hanym Iweta Zemniýe, Latwiýanyň Iýmit we Weterinariýa Gullugynyň Serhet gözegçiligi bölüm müdüriniň orunbasary;
- Jenap Edwards Bakasew, Latwiýanyň Daugawpils şäherindäki Iýmit we Weterinariýa Gullugynyň Serhet gözegçiligi bölüm müdiri.
Seminaryň esasy wezipeleri şulardan ybarat boldy:
- weterinariýa töwekgelçiliklerini dolandyrmak, töwekgelçilikleri bahalandyrmak we profilirlemek babatda halkara tejribe alyşmak;
- importyň gözegçiligi üçin töwekgelçilik derňewine esaslanan milli gözegçilik meýilnamalaryny işläp düzmekde milli hünärmenlere goldaw bermek.
Çärede gatnaşyjylar seminaryň amaly taýdan uly ähmiýetlidigini belläp geçdiler. Bu çäre sebitleýin we halkara derejede weterinariýa gözegçiligi babatdaky hyzmatdaşlygy berkitmäge mümkinçilik berdi. Sebitleýin seminar Merkezi Aziýa ýurtlarynda töwekgelçilik dolandyryş usullaryny utgaşdyrmak ugrunda möhüm ädim boldy.
