Aşgabatda geçirilýän Ýewropa Bileleşiginiň Medeniýet hepdeliginiň çäklerinde 22-nji noýabrda Magtymguly adyndaky milli sazly drama teatrynda Germaniýadan gelen döredijilik toparynyň wekilleri kirişli saz gurallarynda konsert berdiler.
Belläp geçsek, Ýewropa Bileleşiginiň ýurdumyzdaky wekilhanasynyň Germaniýanyň ilçihanasy we Türkmenistanyň Medeniýet ministrligi bilen bilelikde guran bu hepdeligi 18 — 27-nji noýabr aralygynda geçirilýär.
Şu gezekki konsertde nemes nusgawy sazlaryna we opera eserlerinden parçalara aýratyn orun berildi. Germaniýadan gelen «Klenke» kirişli saz topary (kwartet) we dört kirişli kontrabas saz guralyny çalýan, Berliniň döwlet kapellasynyň sazandasy Alf Mozer Gendel, Mosart, Weber, Şuman Ştraus, Reger we Legar ýaly saz sungatynyň ägirtleriniň nusgawy eserlerini ýerine ýetirdiler. «Klenke» kwarteti 30 ýyldan bäri nemes sazlaryndan ybarat çykyşlary bilen Germaniýada we dünýäde giňden tanalýar. Döredijilik toparynyň agzalary — skripkaçylar Annegret Klenke, Beate Hartmann, alt saz guralynyň ussady Iwonn Ulemann we wiolençelçi Rut Kaltenhoýzer nusgawy sazlary ýokary ussatlyk bilen ýerine ýetirip, tomaşaçylaryň şowhunly el çarpyşmalaryna mynasyp boldular.
Ýewropa Bileleşiginiň Türkmenistandaky Medeniýet hepdeliginiň çäklerinde 24-nji noýabrda Italiýanyň “Antonio Flinta Trio” döredijilik toparynyň Magtymguly adyndaky milli sazly drama teatrynda guralan konserti paýtagtymyzyň ýaşaýjylary we myhmanlary üçin ýene-de bir ajaýyp sowgat boldy. Kompozitor we pianinoçy Antonio Flintadan, deprekçi Klaudio Joanniniden, kontrabasçy Roberto Buççiden ybarat topar jaz sungatynyň jadylaýjy owazyny duýmaga mümkinçilik berdi. Italiýaly sungat ussatlarynyň türkmen sazandalary bilen bilelikde ýerine ýetiren “Güýz ýapraklary”, “Dünýä bilen bir boluň!” ýaly jaz sungatynyň ajaýyp eserleri tomaşaçylarda ýakymly täsirleri galdyrdy. Konsertde türkmen aýdym-saz sungatynyň nusgawy eserleri hem ýerine ýetirildi.
Medeniýet hepdeliginiň çäklerinde “Antonio Flinta Trio” döredijilik topary ýurdumyzyň sungat ugurly ýokary we orta hünär okuw mekdeplerinde, şeýle-de paýtagtymyzyň medeni merkezlerinde jaz sungaty bilen gyzyklanýanlar üçin ussatlyk sapaklaryny hem berdiler.
25 — 27-nji noýabr aralygynda bolsa paýtagtymyzdaky “Aşgabat” kinoteatrynda we Fransiýanyň ilçihanasynyň Fransuz institutynda ýewropa filmleriniň we multfilmleriniň görkezilişleri guralar.
