16-njy noýabrda paýtagtymyzyň "Aşgabat" myhmanhanasynda 2024-nji ýylyň "Türki dünýäsiniň beýik şahyry we akyldary Magtymguly Pyragy ýyly" hem-de "Änew şäheriniň Türki dünýäsiniň medeni paýtagty" diýlip yglan edilmegi mynasybetli Türki dünýäsiniň düzme ýazmak ussatlygy we ýaş suratkeşleriň gözi bilen Türkmenistan we Türki dünýäsi surat bäsleşikleriniň ýeňijilerine TÜRKSOÝ tarapyndan baýraklaryň gowşurylyş dabarasy boldy.
Dabara Türkiýeden, Özbegistandan, Gazagystandan, Gyrgyz Respublikasyndan we Türkmenistandan ýeňiji bolan mekdep okuwçylary, degişli guramalaryň ýolbaşçylary, ýurdumyzyň bilim ulgamynyň wekilleri gatnaşdylar. Myhmanhananyň giň eýwanynda ýaş suratkeşleriň işleri sergilendi. Olarda Türki dünýäsiniň medeni ýadygärlikleri, Magtymguly Pyragynyň keşpleri ajaýyp suratlandyrylypdyr. Düzme bäsleşigi-de "Magtymguly Pyragy - şahyr we akyldar" at bilen geçirildi. Iki bäsleşik boýunça her ýurtdan 6 okuwçy sylaglanyldy (degişlilikde I, II, III orunlar). Ýeňijilere degişli diplomlar, gymmat bahaly sowgatlar gowşurlyp, çagalara döredijilik üstünlikleri arzuw edildi.
Maglumat hökmünde bellesek, ýurdumyzdan düzme ýazmak ussatlygy boýunça Gülendam Rahymowa, Mährijemal Begjanowa we Tumar Aşyrowa ýeňiji boldy. Şeýle-de surat çekmek boýunça Mähriban Durdymyradowa, Gülnabat Annanurowa we Begenç Hojagulyýew ýeňiş gazanmagy başardy.
