1-nji noýabrda Nýu-Ýorkda Birleşen Milletler Guramasynyň ýanyndaky Türkmenistanyň Hemişelik wekilhanasynyň edarasynda Türkmenistan bilen Lihtenşteýn Knýazlygynyň arasynda diplomatik gatnaşyklaryň ýola goýulmagy hakynda Bilelikdäki Beýannama gol çekmek dabarasy geçirildi diýip, türkmen daşary syýasat edarasy habar berýär.
Gol çekmek dabarasynyň öňüsyrasynda Türkmenistanyň BMG-niň ýanyndaky hemişelik wekili Aksoltan Ataýewanyň Lihtenşteýn Knýazlygynyň BMG-niň ýanyndaky hemişelik wekili Kristian Wenaweser bilen duşuşygy geçirildi. Duşuşygyň barşynda taraplar iki ýurduň özara gatnaşyklary berkitmek, syýasy, ykdysady we ynsanperwer hyzmatdaşlygy ösdürmek başlangyçlaryny mälim etdiler.
