Emeli aň pudagynda öwrülişik döreden ChatGPT çat-boty bize eýýäm iki ýyl bäri tanyş. OpenAI kompaniýasy tarapyndan işlenip taýýarlanan bu çat-bot häzirki wagtda bütin dünýäde işjeň ulanylýar. Ol iňlis, rus, fransuz, nemes, hytaý, arap, türk we ispan ýaly ýigrimiden gowrak dillerde “gürleşip bilýär”.
ChatGPT türkmen dilini bilýärmi?
Hawa. Ýöne ol häzirlikçe biziň ene dilimizde kämil derejede işlemeýän hem bolsa, türkmen dilinde käbir maglumatlary bermäge synanyşýar.
Aýdaly, türkmen dilinde ýazylan uly möçberli tekstiň ýa-da kitabyň gysgaça mazmunyny çykaryp bermeli. Bu ýagdaýda çat-bota degişli buýrugy ýazyp, teksti ýa-da kitabyň faýlyny ýükläp goýmaly. ChatGPT gysga wagtda bu işi ýerine ýetirip berer.
Aslynda çat-bot tekstiň mazmunyny baýlaşdyrmaga, çylşyrymly, ylmy dilde ýazylan tekstleri çeperleşdirmäge, ýönekeý dile geçirmäge, teksti redaktirlemäge ýardam berýär. Köp sanly dilleri bilýän çatbot şol dillerden tekstleri, ýazgylary türkmen diline terjime hem edip bilýär.
Eýsem, ChatGPT mugallymlar üçin nähili peýdaly bolup biler?
Bu çat-bot mugallymlara okuw meýilnamalaryny we maksatnamalaryny taýýarlamakda, gerekli maglumatlary tapmakda kömek edip bilýär. Şeýle hem mugallymlar belli bir tema boýunça okuwçylara beriljek soraglary taýýarlamakda we okuwçylaryň berýän soraglaryna düşündirişler bermekde çat-botdan peýdalanyp bilerler. Mundan başga-da, sapakda ulanyljak tablisalardyr görkezme esbaplary ChatGPT-ä taýynladyp bolar. Mysal üçin, türkmen dili mugallymy çekimli sesleriň toparlara bölünişi boýunça iň sada we düşnükli tablisany taýynladyp, ony sapakda ulanyp biler.
Ýöne nähili bolanda-da, çat-botuň adamlar tarapyndan döredilen PROGRAMMAdygyny ýatdan çykarmaly däl. Ol ýalňyşyp hem biler.
Bu babatda şeýle ýagdaý boldy: ýurdumyzyň iň beýik nokady barada soralanda, çat-bot onuň Aýrybabadygyny, belentliginiň bolsa 3139 metre barabardygyny hem-de Lebap welaýatynda ýerleşýändigini aýtdy. Emma “Aýrybaba belentligi Mary welaýatynda ýerleşýärmi?” diýip soralanda welin, ol onuň Mary welaýatynda ýerleşýändigini tassyklady.
Emma täze açylan penjirede "Aýrybaba belentligi Mary welaýatynda ýerleşýrmi?" diýlip soralanda, bot tassyklaýjy jogap berdi. Jogaby takyklamak üçin goşmaça soraglar berlende welin, çat-bot ýalňyşyny düzetdi.
Umuman, Amerikanyň ylmy-gözleg kompaniýasy bolan OpenAI tarapyndan işlenip taýýarlanan emeli aňly ChatGPT çat-botunyň örüsi bu ýerde beýan edişimizden has giň. Elbetde, biziň getiren mysallarymyz onuň mugt görnüşi bilen bagly. Ol islendik adamyň ulanmagy üçin elýeterlidir. ChatGPT-ni islendik adam öz gyzyklanýan ugry ýa-da hünäri boýunça ulanyp biler. Ýöne, bu çat-bot entek türkmen dilinde “gürlemek” babatda biraz gögele. Muňa garamazdan, onuň ýene sanlyja ýyllaryň içinde has kämilleşjekdigine ynanýarys.
Galyberse-de, şu makala üçin esasy suraty ChatGPT taýýarlap berdi.
