“Ýüzükleriň hökümdary” (Властелин колец) älemine esaslanýan täze doly metražly animasion filmde tomaşaçylar kino uýgunlaşmasynda Ak Sarumanyň keşbini ýerine ýetiren merhum Kristofer Liniň sesini eşiderler. Şol bir wagtyň özünde, filmi döredijiler emeli aňy ulanmazlar. Bu barada “Ýüzükleriň hökümdary” we “Hobbit” filmleriniň ssenariýaçysy Filippa Boýens “GameSport” neşiri bilen söhbetdeşlikde aýtdy.
Aktýor 2015-nji ýylda aradan çykdy. “Ýüzükleriň hökümdary: Rohirrim urşy” (Властелин колец: Война рохиррим) animasion taslamasyny döredijiler personažyň özboluşly intonasiýasyny bermek üçin onuň arhiw ýazgylaryndan peýdalandylar.
“Biz olary tapdyk we ýene onuň sesini eşidip bildik – ol diňe bir replikalary aýtman, eýsem ýazga alýan wagtymyz biziň bilen gürleşdi. Biz onuň “Size kömek gerekmi, hanym?” jümlesini we onuň wersiýalaryny esas hökmünde aldyk. Ol köp dubl etdi we biz ony täzeçe many tapmak üçin ulanyp bilerismi, biraz üýtgedip bilerismi diýip pikir etdik... ýöne bu henizem Kristofer Liniň rolundan hakyky parça” – diýip, ssenariýaçy gürrüň berdi.
Şol bir wagtyň özünde ol ses režissýorlarynyň toparynyň neýroulgam tehnologiýalaryny ulanmagy meýilleşdirmeýändigini belledi. Liniň sesi onuň asyl görnüşinde ulanylar.
Aktýoryň ýazgylaryny ulanmak üçin filmi döredijiler Liniň aýalyndan resmi rugsady aldylar we şunuň bilen aktýoryň mirasyna hem-de onuň özboluşly ýerine ýetiriş stiline hormaty sakladylar.
