24-nji oktýabrda Türkmenistanyň daşary işler ministriniň orunbasary Ahmet Gurbanow Ermenistanyň Premýer-ministriniň geňeşçisi Artaşes Tumanýan bilen türkmen-ermeni hyzmatdaşlygynyň ileri tutulýan ugurlaryny maslahatlaşdy.
Türkmenistanyň DIM-nde geçirilen duşuşykda, hususan-da, söwda-ykdysady ulgamdaky hyzmatdaşlyk boýunça gyzyklanma bildirilen pikir alyşmalar boldy diýip, ýurdumyzyň daşary syýasat edarasynda habar berdiler.
Taraplar Ermenistanyň Prezidenti Waagn Haçaturýanyň Gündogaryň akyldar şahyry Magtymguly Pyragynyň doglan gününiň 300 ýyllygy mynasybetli geçirilen «Döwürleriň we siwilizasiýalaryň özara arabaglanyşygy – parahatçylygyň we ösüşiň binýady» atly halkara forumyna gatnaşmak üçin ýaňy-ýakynda Türkmenistana amala aşyran iş saparynyň ähmiýetini nygtadylar.
Duşuşygyň ahyrynda taraplar özara bähbitli hyzmatdaşlygy has-da pugtalandyrmaga taýýardyklaryny mälim etdiler.
