Beýik Britaniýanyň Times Higher Education (THE) guramasynyň neşir eden dünýä uniwersitetleriniň ýyllyk görkezijisiniň täze neşirine Türkmenistanyň ýokary okuw mekdepleriniň 13-si «habarçy» derejesinde girdi. Bu barada "Türkmenistan: Altyn asyr" elektron neşiri habar berýär.
"World University Rankings 2025" 21-nji neşirde ýurdumyzyň şu ýokary okuw mekdepleri ýerleşdi:
- Magtymguly adyndaky Türkmen döwlet uniwersiteti
- Döwletmämmet Azady adyndaky Türkmen milli dünýä dilleri instituty
- Türkmenistanyň Telekommunikasiýalar we informatika instituty
- Myrat Garryýew adyndaky Türkmenistanyň Döwlet lukmançylyk uniwersiteti
- Türkmenistanyň Oguz han adyndaky Inžener-tehnologiýalar uniwersiteti
- Seýitnazar Seýdi adyndaky Türkmen döwlet mugallymçylyk instituty
- Türkmenistanyň döwlet energetika instituty
- Türkmen oba hojalyk instituty
- S.A.Nyýazow adyndaky Türkmen oba hojalyk uniwersiteti
- Türkmen döwlet binagärlik-gurluşyk instituty
- Türkmen döwlet ykdysadyýet we dolandyryş instituty
- Türkmen döwlet maliýe instituty
- Ýagşygeldi Kakaýew adyndaky Halkara nebit we gaz uniwersitetidir.
Belläp geçsek, 2022-nji ýylda ilkinji gezek THE görkezijisine Türkmenistanyň Telekommunikasiýalar we informatika instituty wekilçilik etdi. 2023-nji ýylyň görkezijisinde ýurdumyzdan ýokary okuw mekdeplerimiziň 4-si, 2024-nji ýylda 11-si bolan bolsa, täze neşirde 13-si bar.
THE World University Rankings görkezijisi dünýäniň ýokary okuw mekdepleriniň üstünlikleriniň abraýly görkezijileriniň biridir. Uniwersitetler ýokary okuw mekdepleriniň işine giňişleýin baha bermäge mümkinçilik berýän iň soňky WUR 3.0 usulyýeti boýunça ýerleşdirilýär. Ýokary okuw mekdepleri esasy bäş ugurdan: bilim berişi, ylmy barlaglar gurşawy, barlaglaryň hili, senagat bilen özara gatnaşyklar we halkara derejesinde geljegi ýaly ýerine ýetirýän işlerini takyk kesgitleýän 18 görkeziji esasynda kesgitlenilýär.
