Duşenbe güni Nvidia-nyň paýnamalary taryhynda iň ýokary derejesinde ýapyldy, bu hem iri çip öndürijisini Apple-i dünýäniň iň gymmat kompaniýasy tagtyndan düşürmäge ýakynlaşdyrdy.
Maýadarlaryň kompaniýanyň häzirki we geljekki nesil emeli aň prosessorlaryna bolan ýokary islege bil baglaýandygy üçin, onuň paýnamalary 2,4% ýokarlanyp, söwda gününi 138,07 dollar bilen jemledi.
Iýun aýynda Nvidia gysga wagtlyk dünýäniň iň gymmat kompaniýasyna öwrülipdi. Microsoft ondan öňe geçmegi başardy, tehnologiýa üçlüginiň bazar bahalary bolsa eýýäm birnäçe aý bäri ýanaşyk barýar. Soňky üstünlikleri netijesinde Nvidia-nyň bazar bahasy 3,39 trln dollara ýetdi, bu Apple-iň bahasyndan (3,52 trln dollar) birneme pes we Microsoft-yň bahasyndan (3,12 trln dollar) ýokarydyr.
Belläp geçsek, TD Cowen kompaniýasy Nvidia-nyň gymmatly kagyzlary boýunça maksatly bahany 165 dollar derejesinde tassyklady we ony “iň gowy saýlama” diýip atlandyryp, kompaniýanyň häzirki nesil AI çiplerine islegiň ýokary bolmagynda galýandygyny belledi.
Amerikan grafiki prosessor öndürijisi Nvidia-nyň ikinji maliýe çärýeginde girdejisi geçen ýyl bilen deňeşdirilende 122% ýokarlanyp, 30 mlrd dollar boldy. Ikinji çärýekde Nvidia-nyň maglumat merkezleri bilen meşgullanýan bölümçesiniň satuwy rekord 26,3 mlrd dollar boldy, bu 2023-nji ýylyň ikinji çärýegindäkiden 154% köpdür.
