14-nji oktýabrda Aşgabatda Maýa goýum hyzmatdaşlygy boýunça türkmen-hytaý iş toparynyň üçünji duşuşygy geçirildi. Duşuşykda türkmen tarapyna Maliýe we ykdysadyýet ministrliginiň müdirliginiň ýolbaşçysy Galina Romanowa, hytaý tarapyna Söwda ministrliginiň Daşary maýa goýumlar we ykdysady hyzmatdaşlyk bölüminiň başlygynyň orunbasary Ýan Hoa başlyklyk etdi diýip, ORIENT habar berýär.
Duşuşygyň dowamynda 2023-nji ýylyň maý aýynda “Merkezi Aziýa-Hytaý” sammitinde Türkmenistanyň Prezidenti Serdar Berdimuhamedow bilen Hytaý Halk Respublikasynyň Başlygy Si Szinpiniň arasynda gazanylan ylalaşyklary durmuşa geçirmekdäki öňegidişlikler seljerildi we mundan beýläkki gatnaşyklar üçin möhüm ugurlar kesgitlenildi.
Taraplar iş toparynyň ikinji ýygnagyndan soň geçirilen bilelikdäki işiň netijelerine garadylar we 2024-nji ýylyň awgust aýynyň ahyryna çenli Türkmenistanda amala aşyrylan taslamalara 4,18 milliard ABŞ dollary maýa goýan hytaý kompaniýalaryň ornuny bellediler.
Türkmen tarapy hytaýly gatnaşyjylara ýurtdaky maýa goýum ýagdaýyny we iş şertlerini gowulandyrmak üçin görülýän anyk çäreler, Bütindünýä söwda guramasyna goşulmakdaky öňegidişlikler we halkara reýting agentligi “Fitch Rating” reýtingleriniň soňky baha berişleri barada habar berdi.
Hytaý wekiliýeti nebit-gaz pudagy, ulag, himiýa senagaty we ş.m. möhüm taslamalar boýunça alnyp barylýan işler barada habar berdi. Gepleşikleriň dowamynda energiýa çeşmeleri we infrastruktura ýaly hyzmatdaşlygyň däp bolan ugurlarynda özara gatnaşyklary çuňlaşdyrmak, şeýle hem täze energiýa, ýaşyl minerallar we hyzmatdaşlygyň potensialyny kesgitlemek we täze ösüş nokatlaryny döretmek üçin özara taýýarlyk tassyklandy.
