Magtymguly adyndaky Türkmen döwlet uniwersiteti Perujanyň daşary ýurtlular üçin uniwersiteti bilen Özara düşünişmek hakynda Ähtnama gol çekdi. Bu barada türkmen uniwersitetiniň saýtynda habar berilýär.
Bellenilişi ýaly, gol çekmek dabarasy 14-nji oktýabrda Magtymguly adyndaky Türkmen döwlet uniwersitetinde geçirildi.
Dabaranyň dowamynda çykyş edenler iki dostlukly ýurduň arasyndaky alnyp barylýan hyzmatdaşlyklar dogrusynda giňişleýin durup geçdiler. Ähtnama laýyklykda, taraplar:
- daşary ýurt dillerini okatmagyň döwrebap usulyýetini ornaşdyrmak we öňdebaryjy mugallymçylyk tejribesini kämilleşdirmek babatda hyzmatdaşlyk ederler;
- daşary ýurt dillerini okatmak boýunça okuw meýilnamalaryny, maksatnamalaryny, okuw-usuly we ylmy-usuly gollanmalaryny, ylmy neşirleri we okuw kitaplaryny alyşmak bilen birlikde iki ýokary okuw mekdebiniň arasynda hyzmatdaşlygy ösdürerler;
- professor-mugallymlary deň şertlerde alyş-çalyş ederler, Magtymguly adyndaky Türkmen döwlet uniwersitetiniň ýüz tutmagy bilen Perujanyň daşary ýurtlular üçin uniwersiteti italýan dili mugallymlaryny hödürlär hem-de iberer.
