Tesla-nyň baş müdiri Ilon Mask kompaniýanyň iki täze prototipini: CyberCab robotaksisini we Robovan furgonyny hödürledi. Tanyşdyrylyş Kaliforniýadaky Warner Bros. kinostudiýasynda geçirildi.
CyberCab-yň bahasy, takmynan, $30 müň bolar. Awtoulag bortdaky emeli aňly Tesla AI15 kompýuteri bilen dolandyrylýar. Robotakside rul we pedal ýok – ol ýolagçylary sürüji gatnaşmazdan gatnatmak üçin niýetlenen. Onuň “kebelegiň ganaty ýaly açylýan” iki gapysy bar diýip, Bloomberg belleýär.
Salonda diňe iki adam üçin ýer bolup, olaryň öňünde sensor ekrany ýerleşýär.
Elektromobillerden tapawutlylykda robotaksi induktiw (kabelsiz işleýän) zarýad berijiler bilen üpjün edilendir. CyberCab hususy alyjylar üçin elýeterli boljak ilkinji tapgyrlaýyn robotaksi bolar. Ýöne onuň peýda boljak möhleti näbelliligine galýar. Mask 2026-njy ýyl diýip agzady, ýöne gijikdirmeleriň bolup biljekdigini-de belledi.
“Men käwagt çaklamalarda aşa optimist, ýöne 2026-njy ýylda bolup biler. Ýa-da, gowusy şeýle diýeýin: 2027-nji ýyla çenli” – diýip, Bloomberg milliarderiň sözlerini getirýär. Çeşmäniň belleýşi ýaly, Tesla hemişe bellenilen möhlete taýýar bolmaýandygy bilen bellidir, hatda şu tanyşdyrylyş-da ilkibaşda iki aý yza süýşürildi, ahyrynda bolsa bir sagat giç başlady.
Robovan awtonom furgony 20 adamy gatnadyp bilýär. Onuň bahasynyň näçedigi we önümçiliginiň haçan başlajakdygy barada habar berilmeýär. Tesla-nyň mahabat materiallaryna görä, furgon futuristik dizaýna eýe bolar.
Şeýle-de, çärede Optimus robotlary görkezildi. Tanyşdyryş wagtynda olar adamlaryň arasynda gezmeläp, surata düşdüler, ýadygärlik sowgatlaryny paýladylar, tans etdiler we hatda kokteýl taýýarladylar. Maskyň aýtmagyna görä, geljekde şeýle robotlar adamlara gündelik işleriň köpüsini ýerine ýetirmäge – mysal üçin, iti gezdirmäge, çagalara seretmäge, otlary deňlemäge, arassaçylyk işlerini etmäge, gülleri suwarmaga we tagam taýýarlamaga kömek edip biler.
“Optimus biziň aramyzda bolar. Siz olaryň ýanyna bararsyňyz, olar bolsa size içgi hödürlär” – diýip, Mask belledi.
Şeýle robotlaryň bahasy $20-30 müň bolar.
