9-njy oktýabrda Saglygy goraýyş we derman senagaty işgärleriniň güni mynasybetli Lebap welaýatynyň Türkmenabat şäherinde glisirrizin turşusyny öndürýän kärhana, Mary şäherinde bolsa welaýat we şäher Arassaçylyk we keselleriň ýaýramagyna garşy göreşmek gullugynyň täze edara binasy açylyp ulanmaga berildi.
Buýan köküni gaýtadan işlemegiň hasabyna ýylda 390 tonna arassalanmadyk glisirrizin turşusyny öndürmäge ukyply kärhananyň gurluşygyna Türkmenistanyň Prezidentiniň Kararyna laýyklykda, 2022-nji ýylyň ýanwar aýynda badalga berlipdi. Mälim bolşy ýaly, buýan kökündäki glisirrizin turşusy wiruslara garşy netijeli serişde hökmünde gadymdan bäri lukmançylykda giňden ulanylýar.
«Mizemez gadam» hususy kärhanasy tarapyndan gurlan täze kärhana Türkmenistanyň Saglygy goraýyş we derman senagaty ministrliginiň «Buýan» obasenagat toplumynyň düzümine girýär. Bu toplum buýan kökünden önüm öndürmäge ýöriteleşendir.
Açylyş dabarasy mynasybetli täze kärhana Türkmenistanyň Prezidentiniň adyndan ulag serişdeleri sowgat berildi.
Mary welaýatynyň we Mary şäheriniň Arassaçylyk we keselleriň ýaýramagyna garşy göreşmek gullugynyň täze edara binasynyň gurluşygyny «Şadyýan gurluşyk» hojalyk jemgyýeti ýerine ýetirdi.
Mary welaýatynyň we Mary şäheriniň Arassaçylyk we keselleriň ýaýramagyna garşy göreşmek gullugynyň täze edara binasy Germaniýanyň, Fransiýanyň, Italiýanyň, ABŞ-nyň, Hytaýyň dünýä belli kompaniýalarynyň öňdebaryjy lukmançylyk enjamlary bilen doly üpjün edildi.
Bu binanyň açylyp ulanmaga berilmegi mynasybetli Türkmenistanyň Prezidentiniň adyndan «Mercedes-Benz» kysymly göçme barlaghana awtoulagy we «Toyota Сorolla» kysymly ýeňil awtoulag sowgat berildi.
