Medeni miras ylmy institutynyň alymlary nusgawy sungat eserlerinde ulanylan boýaglaryň himiki düzümini seljermek üçin emeli aň döretdiler. Bu model Rafaeliň 1501-1502-nji ýyllarda döreden suratlary babatda üstünlikli ulanyldy diýip, Phys.org habar berýär.
Kartinalary dikeltmek işi sungat bilen ylymyň çatrygynda. Bu ugurdaky hünärmenler himiýa, botanika we taryh ýaly dürli dersleri bilmelidirler. Gadymy kartinalary dikeldýänlere boýaglaryň himiki düzümi hakynda takyk maglumatlary bilmek möhümdir, sebäbi maddalaryň nädogry saýlanmagy olaryň zaýalanmagyna sebäp bolup biler.
Aýry-aýry boýaglary kesgitlemek köplenç kyn, sebäbi suratkeşler gerekli reňki almak üçin pigmentleri garyşdyrýarlar. Şol sebäpli himiki düzümiň kesgitlenilişi köplenç çaklamalara esaslanyp, mydama dogry bolup durmaýar.
Adatça, derňew üçin rentgen fluoresensiýasy usuly ulanylýar, ýöne bu çylşyrymly pigmentleri kesgitlemegi kynlaşdyrýar.
Bu meseläni çözmek üçin alymlar makro-rentgen fluoressensiýa maglumatlaryny seljerýän we pigmentleriň düzümini kesgitleýän AI modelini döretdiler. Bu model 57 dürli pigmenti görkezýän 500 müň spektrli maglumatlar bazasynda tälim aldy.
Gözleg topary modeliň işlenip düzülişini we deslapky synagy tamamlandan soň esasy synag işine başlady. AI Rafaeliň 1501-1502-nji ýyllara degişli iki sany kartinasyny döretmek üçin ulanan ýaglarynyň himiki düzümini kesgitlemek üçin peýdalanyldy. Himiki komponentler alymlara başga usullar arkaly eýýäm mälimdi. AI modeli ak reňkdäki gurşun, gyzyl reňkdäki simap we ýaşyl reňkdäki mis ýaly himiki serişdeleri kesgitlemegi başardy.
