7-nji oktýabrda Moskwada geçirilen GDA-nyň agza döwletleriniň Daşary işler ministrleriniň Geňeşiniň mejlisinde Aşgabadyň "Arkalaşygyň täze sport mümkinçilikleriniň şäheri" diýlip yglan edilmegi bilen baglanyşykly 2024-2025-nji ýyllarda geçiriljek çäreleriň Meýilnamasy tassyklanyldy. Bu barada GDA-nyň internet-portaly habar berýär.
Meýilnama türkmen paýtagtynda sportuň dürli görnüşleri boýunça çempionatlary, halkara sport ýaryşlaryny, şeýle hem bilim we sport-köpçülikleýin ýaryşlary geçirmegi öz içine alýar. GDA ýurtlarynyň hem-de gyzyklanma bildirýän beýleki ýurtlaryň gatnaşmagynda geçiriljek "Dostluk oýunlaryny" geçirmäge aýratyn üns berler.
Mejlisde Türkmenistana Russiýa Federasiýasyndaky ilçi Esen Aýdogdyýew wekilçilik etdi. Geňeşmeleriň barşynda şeýle hem bedenterbiýe we sport ulgamynda hyzmatdaşlyk hakynda beýannama kabul edildi.
Diplomatlar şeýle hem GDA-nyň çäklerinde 2025-nji ýyl üçin Daşary işler ministrlikleriniň arasynda syýasy geňeşmeleriň Meýilnamasyny tassykladylar.
Mundan başga-da, Halkara ýaşlar hyzmatdaşlygy strategiýasyny durmuşa geçirmek boýunça 2025-2026-njy ýyllar üçin çäreleriň Meýilnamasy kabul edildi.
Şeýle hem diplomatlar GDA-nyň agza döwletleriniň Baştutanlarynyň garamagyna hödürlenjek birnäçe resminamalaryň taslamalaryny makulladylar.
GDA-nyň agza döwletleriniň Daşary işler ministrleriniň Geňeşiniň indiki mejlisi 2025-nji ýylyň 11-nji aprelinde Gazagystanda geçiriler.
