Saud Arabystanynyň haj we umra işleri ministri, doktor Taufik bin Fauzan Al-Rabianyň ýolbaşçylygyndaky wekiliýet Türkmenistanda resmi saparda bolup birnäçe duşuşyklary geçirdi.
Zyýaratçylara hyzmat etmek bilen meşgullanýan ýokary wezipeli adamlardan düzülen wekiliýet duşuşyklaryň dowamynda Saud Arabystany Patyşalygy bilen Türkmenistanyň arasynda zyýaratçylar üçin hyzmatlar pudagynda hyzmatdaşlygy giňeltmegiň ýollaryny maslahatlaşdy diýip, spa.gov.sa saýty ýazýar.
Saparyň çäginde ministr Taufik bin Fauzan Al-Rabia Türkmenistanyň wise-premýeri Baýramgul Orazdurdyýewa, şeýle hem ýurduň müftüsi Ýalkap Hojagulýew bilen duşuşdy. Duşuşykda haj däp-dessurlaryny aňsatlyk we rahatlyk bilen ýerine ýetirmekleri üçin zyýaratçylaryň tejribesini nädip baýlaşdyrmalydygyna üns çekildi.
Mundan başga-da, wekiliýetiň düzüminde Türkmenistana gelen Saud Arabystany Patyşalygynyň Raýat awiasiýasy müdirliginiň başlygy bilen Türkmenistanyň Ministrler Kabinetiniň ýanyndaky Ulag we kommunikasiýa agentliginiň baş direktorynyň arasynda hem möhüm duşuşyk geçirildi. Onda Türkmenistandan barýan zyýaratçylaryň syýahaty bilen baglanyşykly hyzmatlary gowulandyrmak üçin hyzmatdaşlygyň we ugurdaş tagallalary utgaşdyrmagyň ýollary ara alnyp maslahatlaşyldy.
