Özüniň smartfonlary bilen tanalýan Xiaomi kompaniýasy awtomobil ugruny işjeň ösdürmegi dowam etdirýär. Sentýabr aýynda satuwy dört aý bäri 10 müň birlikden geçýän SU7 modeliniň üstünlikli çykyşyndan soň, kompaniýa önümçiligi iki esse artdyrmagy meýilleşdirýär diýip, Gizmochina habar berýär.
Xiaomi Group-yň esaslandyryjysy Leý Szýunyň aýtmagyna görä, oktýabr aýynda 20 000-den gowrak SU7 awtomobilini öndürmek meýilleşdirilýär. Munuň üçin kompaniýa innowasiýalary ornaşdyryp, önümçilik işleriniň netijeliligini ýokarlandyrýar. Aýratynam, zawodyň gurnawyna üýtgeşmeler girizildi we emeli aň ýaly täze tehnologiýalar ulanyldy. Munuň netijesinde, Xiaomi önümçilik hatarynyň her bir tapgyrynyň öndürijiligini ep-esli ýokarlandyrmagy başardy.
Öň, Leý Szýun Xiaomi Automobile bölüminiň 2024-nji ýylda 100 000-den gowrak Xiaomi SU7 awtomobilini bazara ibermegi maksat edinendigini habar berdi.
Resmi däl maglumatlara görä, Xiaomi SU7-niň üpjünçiligi sentýabr aýynda 15 müňden 16 müň birlige çenli boldy. Oktýabr aýynda üpjünçiligiň hepdelik derejesiniň 5 müň awtomobile ýetmegine garaşylýar.
