Bütindünýä saglygy goraýyş guramasy (BSGG) maýmyn mamasynyň ýaýramagyna garşy göreşde möhüm ädim ätdi. Gurama barlaghana şertlerinde bu howply wirusy anyklamak üçin ilkinji barlag usulynyň ulanylmagyny tassyklady diýlip, guramanyň saýtynda habar berilýär.
BSGG Abbott Molecular Inc. kompaniýasy tarapyndan döredilen Alinity m MPXV barlag toplumynyň kesel hadysalary ýokary bolan ýurtlarda çalt we takyk barlag geçirmek mümkinçiliklerini giňeltjekdigini belleýär.
Irki anyklaýyş hassalaryň wagtynda bejerilmegini we idegini üpjün etmek, şeýle-de wirusyň ýaýramagyna gözegçilik etmäge mümkinçilik bermek bilen, maýmyn mamasyna garşy göreşde möhüm rol oýnaýar. Gurama Afrikada wirus hadysalaryny barlamak mümkinçiliginiň çäklidigini belledi.
Maýmyn mamasy – adatça, Afrikanyň käbir sebitlerinde duş gelýän seýrek wirus keseli. Ýöne soňky aýlarda kesel ýaýrawy ABŞ-da, Ispaniýada, Fransiýada, Beýik Britaniýada, Şwesiýada we Marokkoda hasaba alyndy. Afrika Bileleşiginiň Kesellere gözegçilik merkeziniň maglumatlaryna görä, ýylyň başyndan bäri sebitde wirus sebäpli 866 adam aradan çykdy.
