Dubaýda dünýäniň iň beýik ýaşaýyş jaýlarynyň birine öwrüljek täze gökdirän binasy gurlar. Takmynan, 1 milliard dollar bahasy bolan Tiger Sky Tower binasy diňe beýikligi (532 metr, 122 gat) bilen däl, eýsem, çölüň ortasyndaky oazisi ýada salýan özboluşly dizaýny bilen hem haýran galdyrar. Bu desganyň gurluşygy birbada birnäçe rekordlary goýar diýip, "Wokrug sweta” neşiri belleýär.
Binanyň esasy aýratynlygy, onuň içinde 447 metr belentlikde ýerleşýän dünýäniň iň beýik tropiki tokaýy bolar. Bu ýerde ekzotik ösümliklerden, seýrek agaçlardan we tropiki guşlardan başga-da pyýada we ylgaw ýodalary, dynç alyş külbeleri we hatda asma ýoly bolar.
Şeýle hem Tiger Sky Tower-da 431 metr beýiklikde ýerleşýän açyk panorama howzy bolar.
Mundan başga-da, diňde 849 sany kaşaň ýaşaýyş jaýy bolar, olaryň iň sada görnüşiniň bahasy 680 000 dollar.
Binada ýerleşýän, dünýäniň iň beýik “şa penthausy” aýratyn gyzyklanma döredýär.
Tiger Sky Tower-iň gurluşygy 2029-njy ýyla çenli tamamlanar. Gökdirän bina diňe bir binagärlik eseri bolman, eýsem, şäher durmuşynyň tebigat bilen birleşjek ýerine öwrüler.
