Betmen Golliwuddaky “Şöhrat alleýasynda” ýyldyz alan ilkinji supergahryman boldy. Resmi dabara Los-Anjelesde, Ginnesiň rekordlar muzeýiniň golaýynda geçirildi diýip, Variety habar berýär.
Betmeniň ýyldyzy bu meşhur ýerde 2790-njy boldy. Onuň açylyşy personaža şeýle hormata mynasyp bolan ilkinji supergahryman hökmünde ýene bir rekordy getirdi.
Dabara DC wekilleri, şol sanda prezident we baş döredijilik müdiri Jim Li we uly wise-prezident Enn DePis gatnaşdy. Şeýle-de, Ginnesiň rekordlar kitabynyň emini Maýkl Emprik gatnaşyp, resmi şahadatnamany gowşurdy.
“Betmen – iň tanalýan we söýgüli medeni nyşanlaryň biri, şonuň üçin onuň Golliwudyň Şöhrat alleýasynda ýyldyza mynasyp bolmagy meniň üçin geň däl. Bu üstünlik komiksleriň meşhur medeniýete ýetirýän güýçli we barha ösýän täsirini görkezýär, komikslere, grafiki romanlara, teleşouwlara we filmlere şeýle dowamly täsiri ýetiren supergahrymanlar hem kän däl. Gutlaýaryn, Betmen” diýip, dabarada Ginnesiň rekordlar kitabynyň baş redaktory Kreýg Glendeý aýtdy.
Betmen DC Comics üçin Bob Keýn we Bill Finger tarapyndan döredildi we ilkinji gezek 1939-njy ýylda Detective Comics #27-de peýda boldy. Şondan bäri ol köp komikslerde, teleşouwlarda we filmlerde çykyş etdi. Kinoda personažyň keşbini Maýkl Kiton, Jorj Kluni, Ben Afflek we Robert Pattinson ýaly Golliwud ýyldyzlary ýerine ýetirdi.
Personažyň ady dürli rekordlar bilen baglanyşykly: LEGO® Batman: The Videogame supergahrymanlar barada iň köp satylan wideo oýun, “Batman Arkham” bolsa supergahrymanlar barada iň köp satylan wideo oýun seriýasydyr.
Personaž şol bir supergahrymany oýnan (Kluni, Beýl we Afflek) “Oskar” baýragynyň eýeleriniň sany boýunça-da rekord eýesidir.
