27-nji sentýabrda Brýusselde Türkmenistanyň ilçihanasynyň guramagynda ýurdumyzyň Garaşsyzlygynyň 33 ýyllygy mynasybetli dabaraly kabul edişlik geçirildi. Çärä 20-den gowrak ilçiler, diplomatik wekilhanalaryň, Ýewropa Bileleşiginiň düzümleriniň we işewürler jemgyýetiniň wekilleri gatnaşdylar diýip, ORIENT diplomatik wekilhana salgylanyp habar berýär.
Türkmenistanyň ilçisi Sapar Pälwanow öz çykyşynda ýurdumyzyň gazananlary hem-de Belgiýa we ÝB bilen ikitaraplaýyn gatnaşyklaryň möhümligi dogrusynda durup geçdi. Şeýle hem çärede Belgiýanyň DIM-niň ikitaraplaýyn meseleler boýunça baş direktory Žeron Koreman çykyş etdi. Ol Türkmenistan bilen Belgiýanyň arasynda ikitaraplaýyn gatnaşyklary berkitmegiň möhümligi dogrusynda durup geçdi.
Türkmen ilçihanasynyň goldaw bermeginde döredilen aýdym-sazly wideoşekiliň görkezilmegi baýramçylyk agşamynyň esasy wakasy boldy. Ýerli repçi-aýdymçy Toni bilen döredilen şekilli aýdym Türkmenistan bilen Belgiýanyň arasyndaky medeni köprini alamatlandyrdy we çärä gatnaşýanlaryň oňyn seslenmesine eýe boldy.
Şeýle hem dabaranyň çäklerinde Niderlandlardan «Mengli Secrets» modalar öýüniň mini-defilesi geçirildi. Onda däp bolan türkmen egin-eşiklerinden täsirlenip döredilen kolleksiýalar görkezildi.
Dabarada şeýle hem ýerli skripkaçy we kompozitor Annetta Homann türkmen akademiki sazynyň ussady Nury Halmämmedowyň eserlerini ýerine ýetirdi.
Baýramçylyk agşamy däp bolan türkmen tagamlarynyň hödür edilmegi bilen tamamlandy.
