British Journal of Ophthalmology žurnalynda çap edilen barlagyň netijesine görä, şowakörlükden (miopiýa) ejir çekýän çagalaryň we ýetginjekleriň sany 2050-nji ýyla çenli 740 milliondan geçip biler diýip, The Guardian habar berýär.
Guançžoudaky Sun Ýatsen adyndaky Çžunşan uniwersitetiniň geçiren derňewi, 1990-njy ýyldan bäri miopiýanyň ýaýramagynyň ep-esli ýokarlanandygyny görkezdi. 1990-njy ýyllarda çagalaryň we ýetginjekleriň 24%-ine miopiýa diagnozy goýuldy we 2020-nji ýyla çenli bu görkeziji 36%-e çenli ýokarlandy.
Dünýädäki ýaşlaryň üçden birinden gowragynyň şowakörlükden ejir çekýändigi we asyryň ortalaryna bu görkezijiniň 40%-e çenli ýokarlanyp biljekdigi bellenilýär.
Barlagçylar bu meseläni kompýuteriň ekranlarynyň we enjamlarynyň öňünde sarp edilýän wagtyň artmagy, şeýle hem daşarda geçirilýän wagtyň azalmagy bilen baglanyşdyrýarlar.
Hünärmenler tebigatda has köp wagt geçirmegi, maşk etmegi we ekrana azrak seretmäge synanyşmagy maslahat berýärler. Şeýle hem ene-atalara we mugallymlara miopiýanyň irki alamatlaryna we bejergisine üns bermegi maslahat berilýär.
