Türkmenistanyň Russiýa Federasiýasyndaky ilçisi Esen Aýdogdyýew Garaşsyz Döwletleriň Arkalaşygyna agza döwletleriniň ulag boýunça utgaşdyryjy maslahatynyň Ýerine ýetiriji komitetiniň başlygy Gennadiý Bessonow bilen ýakynda geçiren duşuşygynda GDA-nyň çäginde ulag we logistika pudagyndaky hyzmatdaşlyk meselelerini maslahatlaşdy. Bu barada ýurdumyzyň RF-däki ilçihanasynda habar berdiler.
Hususan-da, “Ulag hepdeligi-2024”-iň “meýdançasynda” noýabr aýynda Moskwada meýilleşdirilýän GDA agza döwletleriniň ulag boýunça utgaşdyryjy maslahatynyň 44-nji mejlisiniň geçirilmegi barada giňişleýin durlup geçildi.
GDA-nyň çägini hasaba almak bilen “Demirgazyk-Günorta” geçelgesiniň we gündogar ugruň mümkinçiligini ýokarlandyrmak meýilnamalaryny, Türkmenbaşynyň Halkara deňiz portuny we logistika merkezini döretmek meýilnamasyny göz öňünde tutup, Astrahan sebitiniň portunyň ýörite ykdysady zolagynda Türkmenistanyň logistika merkezini döretmek, pudakda sanly tehnologiýalary ornaşdyrmak we beýleki taslamalar Türkmenistanyň halkara ulag we üstaşyr hyzmatdaşlygynyň gün tertibini düzýär.
