Volkswagen 40 ýyldan soň, Ýewropada meşhur Polo modeliniň önümçiligini tamamlaýar. Bu karar elýeterli elektrik ulaglarynyň önümçiligine geçilmegi bilen baglanyşyklydyr diýip, IXBT habar berýär.
Ispaniýanyň Pamplona şäherinde ýerleşen, 1984-nji ýyldan bäri 8,4 milliondan gowrak Polo awtoulagyny öndüren zawod bu modeli ýygnamagy bes eder.
DataForce-iň berýän maglumatlaryna görä, Polo Ýewropada iň geçginli kiçi awtoulaglaryň biri bolmagynda galýar we 2024-nji ýylyň ilkinji sekiz aýynda onuň 90 100-den gowragy satylyp, sekizinji orunda durýar.
2026-njy ýyldan başlap, Pamplona zawody täzelenen MEB platformasynda elektrik ulaglarynyň Volkswagen ID setirinde ulanylýan iki sany ykjam elektrik krossoweri öndürip başlar.
Ýewropada önümçiligiň bes edilýändigine garamazdan, sebitde Polo modeliniň satuwy dowam etdiriler, ýöne ony Günorta Afrikadaky Kariýega zawodynda öndürerler.
