Iki gezek “Sezar” baýragynyň eýesi Katrin Denýow kino baýragynyň gowşurylyşynyň 50 ýyllyk ýubileý dabarasynda eminler toparynyň başlygy wezipesine bellendi. Bu çäre 2025-nji ýylyň 28-nji fewralynda Pariždäki "Olimpiýa" konsert zalynda geçip, Kanal+ ýaýlymynda görkeziler diýip, Variety habar berýär.
Kinematografiýa sungaty we tehnologiýalar akademiýasy kinematografiýada bitiren ajaýyp hyzmatlary üçin 80 ýaşly aktrisany saýlady. Akademikler Denýowyň fransuz kinosynyň we estetikasynyň nusgasydygyny, bu bolsa ony şeýle möhüm ýylda başlyklyk etmek üçin örän laýyk dalaşgäre öwrülýändigini bellediler.
Karýerasynda Denýow 14 gezek “Sezara” dalaşgär görkezilip, “Soňky metro” (1980) we Indokitaý (1992) filmleri üçin “Iň oňat zenan keşbi” diýen ugurda iki gezek ýeňiji boldy. Şeýle hem soňkusy üçin ol “Oskar” baýragyna dalaşgär görkezildi we 1994-nji ýylda Fransiýa üçin “Iň gowy daşary ýurt filmi” kategoriýasynda ýeňiji boldy.
Katrin Denýow 1983-nji ýylda-da “Sezaryň” emin agzalaryna ýolbaşçylyk edipdi. Mundan başga-da, 1994-nji ýylda Kan film festiwalynda emin agzalarynyň wise-prezidenti bolup, 2006-njy ýylda Wenesiýa film festiwalyna ýolbaşçylyk etdi.
“Sezar” baýragy 1976-njy ýyldan bäri gowşurylýar we “Oskaryň” fransuz analogy hasaplanýar.
