Hindistanyň hökümeti birnäçe uly kosmos taslamasyny durmuşa geçirmek boýunça meýilnamalaryny tassyklady. Bu meýilnamalar Aý topragyny Ýere getirmegi, Wenera missiýa uçurmagy we ilkinji milli orbital stansiýany gurmagy öz içine alýar diýip, “Laýfhaker” habar berýär.
“Çandraýan-4” missiýasynyň çäklerinde Aýdan toprak nusgalaryny getirmek üçin iki sany LVM 3 raketasyny ulanmak meýilleşdirilýär. Taslamanyň bahasy 21 mlrd rupiýa (takmynan, 251 mln dollar) bolar. Bu ädim hindistanly astronawtlaryň 2040-njy ýyla meýilleşdirilen Aýa gonuşyndan öň taýýarlyk tapgyry bolar. Ýatlap geçsek, “Çandraýan-3” missiýasy 2023-nji ýyla Aýa üstünlikli gonuşy amala aşyryp, Hindistany şeýle üstünlige ýeten dördünji ýurda öwürdi.
2028-nji ýylyň mart aýyna meýilleşdirilen Venus Orbiter Mission (VOM) missiýasy Weneranyň atmosferasyny we geologiýasyny öwrenmäge gönükdirilendir. Ony durmuşa geçirmek üçin 12,36 mlrd rupiýa (takmynan, 147 mln dollar) bölünip berildi.
Esasy taslamalaryň ýene biri Bharatiya Antariksh (BAS-1) orbital stansiýasyny döretmekdir. Stansiýanyň birinji modulyny 2028-nji ýylyň dekabr aýynda uçurmak meýilleşdirilýär. Şeýle-de, geljekki meýilnamalaryň arasynda köp gezeklik NGLV raketasyny işläp taýýarlamak we sekiz ýylyň dowamynda üç synag uçuşyny geçirmek bar.
